ဂစ်တာအမြန်တီးချင်တယ် ဆိုရင် ......

" ကျွန်တော် လက်မြန်အောင် ဘယ်လိုလေ့ကျင့်ရမလဲ " ဆိုတဲ့ မေးခွန်းက ဂစ်တာသင်တန်းတိုင်းမှာ တစ်လကို အကြိမ်၃၀ထက်မနည်း ကြားရတဲ့ မေးခွန်းပါ ။ ဂစ်တာသမားတိုင်း မမေးဖူးသူ မရှိလောက်ဘူး ထင်ပါရဲ့ ။ တူရိယာသမားတိုင်းကို စိန်ခေါ်တဲ့အရာတွေမှာ speedက ထိပ်ဆုံးက ပါဝင်သလို ... အားလုံးကလည်း လိုချင်တပ်မက်ကြတယ် ။ ဒါပေမယ့် ... ကျွန်တော်တို့ သတိမမူမိတဲ့  speedရဲ့ တခြားတဖက်ကို ကြည့်လိုက်တဲ့အခါလည်း ...  စွဲမက်ရင်ခုန်ဖွယ်ကောင်းတဲ့ သီချင်းတစ်ပုဒ် ၊ solo တစ်ပုဒ်ကို speed မပါဝင်ဘဲ ...  ဖန်တီး ၊ တီးခတ်ဖို့ ...   ရိုးရှင်းလှပတဲ့ (သို့) ရှုပ်ထွေးနက်နဲတဲ့ ... ဟာမိုနီအသံတွဲတွေ ၊ ကော့ဒ် နဲ့ arpeggios တွေ ၊ စည်းတန်ဖိုး နုတ်တန်ဖိုးတွေ ၊ တခြားသော တက်ကနစ်များဖြင့်လည်း တီးခတ် ဖန်တီးလည်း ရတာပဲ ။ ဆိုလိုချင်တာတော့ Good music နဲ့  Fast music ဆိုတာ တစ်ခုတည်း မဟုတ်ဘူး ။ ဒါကိုလည်း ကျွန်တော်တို့ သဘောပေါက်ထားဖို့ လိုတယ် ။ ခင်ဗျားက speed သိပ်ကောင်းတဲ့ ဂစ်တာသမား ဆိုရင်တော့ ... သီချင်းတွေကို ပိုပြီး ကျယ်ပြန့်လွယ်ကူစွာနဲ့ ဖန်တီးလုပ်ဆောင်နိုင်မယ်ဆိုတာ ယေဘုယျအားဖြင့် ငြင်းချက်မရှိပါဘူး ။ ဒါပေမယ့် ... အများစုရဲ့ မေးခွန်းကတော့ ... " ကျွန်တော် လက်မြန်အောင် ဘယ်လိုလေ့ကျင့်ရမလဲ "

အခြေခံ Sweep picking နှင့် Arpeggios သင်ခန်းစာ - ၁

Sweep picking ကို economic picking လို့လည်း ခေါ်တယ် ။ Alternate (down-up) မတီးဘဲ ၊ down-down-down . up-up-up စသည်ဖြင့် sweep လုပ်ပြီး တီးခတ်ရပါတယ် ။ sweep picking ကို Arpeggios တွေ တီးခတ်တဲ့အခါ အများဆုံး အသုံးပြုလေ့ရှိတယ် ။ Arpeggio ဆိုတာတော့ chord ပါဝင်တဲ့ အသံတွေကို လုံးကောက်တီးတာပါ ။

sweep picking တီးပုံနဲ့ alternate picking (stroke) တီးပုံ သဘောတရား မတူပါ ။ sweep picking တီးတယ်ဆိုတာ ... pick ကိုင်ထားတဲ့လက်ကို ... အောက်ဆွဲချလိုက်တဲ့အခါ pick က ကြိုးကို ထိခတ်သွားတဲ့အတွက် အသံထွက်လာတဲ့ပုံစံမျိုး တီးတာပါ ။ အပေါ်ပြန်တက်လည်း ဒီတိုင်းပါပဲ ။ အဲဒီလို စနစ်တကျတီးဖို့ ... pick ဟာ floating ဖြစ်ရတယ် ။ floating ဖြစ်တယ်ဆိုတာ ပေါ့ပါးပြီး ပေါလောပေါ်နေတဲ့သဘောပါ ။ မြင်သာအောင် ဥပမာပေးရရင် rest stroke တီးသလိုပါ ။ ၆ကြိုးကို တီးလိုက်တဲ့အခါ pick က ၅ကြိုးပေါ်မှာ သွားရပ်တယ် ၊ တင်နေတယ် ။ ၅ကြိုးကို တီးပြီးတဲ့နောက် ၄ကြိုးပေါ်မှာ pick က သွားတင်တယ် ။ (သဘောပြောတာပါ ၊ တမင်အောက်ကြိုးပေါ်တင်အောင် rest stroke မတီးပါဘူး ၊ pick ကို ခပ်ဖွဖွကိုင်ပြီး ကြိုးတွေပေါ် ဆွဲချလိုက်တဲ့အခါ အဲဒီသဘောမျိုး အလိုလို floating  ဖြစ်သွားပါတယ်) ။ Arpeggio တွေ မတီးခင်မှာ sweep picking သဘောကို နားလည်သွားအောင် အောက်ကလေ့ကျင့်ခန်းလေးနဲ့ စလိုက်ရအောင် ။ (ဒီလေ့ကျင့်ခန်းကအရေးကြီးပါတယ်)

ဂစ်တာကြိုးတွေကို ဘယ်လက်နဲ့အုပ်ထားပြီး ၊ ညာဘက်က pick ကို ခပ်ဖွဖွကိုင်ပြီး ၆ကြိုးကနေ ၁ ကြိုးအထိ ဆွဲချလိုက်ပါ ။ တစ်ကြိုးချင်းစီ တကူးတက တီးတာ မဟုတ်ပါဘူး ။ အပေါ်မှာ ရှင်းပြခဲ့ပြီးပါပြီ ။ pick ကို ဖွဖွကိုင် ၊ ညာလက်ကို စည်းချက်အတိုင်း အောက်ဆွဲချ ၊ အပေါ်ဆွဲတင် .. အကြိမ်များစွာလေ့ကျင့်ပေးရင် sweep picking ရဲ့ swing သဘောကို သိလာပါလိမ့်မယ် ။ အဲဒီအခါ Arpeggios တွေကို စတင်လေ့ကျင့်ပါမယ် ။

Arpeggios in 1st and 2nd strings
Ex - 1

Em chord arpeggio ပါ ။ minor chord structure = Root , minor third , Perfect fifth - 1 3b 5 ဖြစ်တဲ့အတိုင်း E B G နုတ်တွေ ပါဝင်ပါတယ် ။ note , tabs, strokes အားလုံးရေးပေးထားပါတယ် ။ အခြေခံအကျဆုံး arpeggio pattern တစ်ခုဖြစ်လို့  စနစ်တကျ အမှားကင်းအောင် လေ့ကျင့်ဖို့ လိုပါတယ် ။ 

*** အနှေးဆုံးနဲ့ တီးပါ ။ *** pick ကို floating ဖြစ်အောင် သတိထားပေးပါ ***

Ex - 2
အပေါ်က လေ့ကျင့်ခန်းကို ထပ်မံဆင့်ပွားပြီး ပြုလုပ်ထားတာပါ။ ပါဝင်တဲ့ နုတ်တွေကို သတိထားပြီးတီးကြည့်ပါ ။
major chord structure = Root , Major third , Perfect fifth - 1 3 5 ဖြစ်ပါတယ် ။ (minor chord structure ကို ရှေ့ကလေ့ကျင့်ခန်းမှာ ပြောခဲ့ပြီးပါပြီ ) ။ % ဆိုတာ Repeat one bar ပါ ။ ရှေ့တဘားကို နောက်တစ်ခေါက် ထပ်တီးရတာပါ ။

Ex - 3
ဒီလေ့ကျင့်ခန်းက Am  key ပါ ။ Am ကို အစနဲ့အဆုံးမှာ pattern ၂မျိုးနဲ့ တီးထားပါတယ် ။ ဒုတိယ pattern ဟာ လက်ကို အနည်းငယ် ချဲကားပေးဖို့ လိုသလို ၊ ကိုယ်တွယ်တီး ခတ်တဲ့ လက်ချောင်းတွေ မှန်ကန်ဖို့လည်း လိုအပ်ပါတယ် ။ (နုတ်ရဲ့ဘေးမှာ လက်ချောင်းနံပါတ်တွေ ရေးပေးထားပါတယ် ။)

Ex - 4
အပေါ်က quaver note pattern တွေကို semi-quaver pattern တွေ ပြောင်းလိုက်တာပါ ။ ex 4 and 5 ကို နားထောင်ကောင်းအောင် backing guitar တီးပေးထားပြီး ၊ tempo အနည်းငယ်မြန်ပေးထားပါတယ် ။ လေ့ကျင့်သူတွေကတော့ အနှေးဆုံးကနေ စတီးပြီး ၊ အမှားကင်းပြီး ပိုင်နိုင်ပြီဆိုမှ တဖြည်းဖြည်း tempo တင်ပြီး လေ့ကျင့်ပေးပါ ။

Ex - 5

(ဒီလေ့ကျင့်ခန်းတွေက Arpeggios အတွက် အခြေခံတွေဆိုပေမယ့် ... Fret-board , Chords , chord theory, Scales , Alternate picking တွေကို အတော်အတန် တီးခတ်နိုင်ပြီ နားလည်ကျေညက်ပြီဆိုမှ Arpeggios ကို လေ့ကျင့်သင့်ပါတယ် )
guitar pro နဲ့ လေ့ကျင့်သူတွေအတွက် gpx file = download link

ရွှင်လန်းချမ်းမြေ့ပါစေ ....

လူတစ်ယောက်

Finger Stretching for Guitar

Fretboard ပေါ်မှာ ရွေ့လျားနေတဲ့ ဂစ်တာသမားရဲ့လက်ဟာ ပြေးလွှားနေတဲ့ ပင့်ကူတစ်ကောင်နဲ့ သဏ္ဌာန်တူတယ် ။ ကိုယ်ထည်ဖြစ်တဲ့ လက်ဝါးက ဂစ်တာလက်တံကို အုပ်မိုးထားပြီး ၊ လက်ချောင်းထိပ်တွေက ပင့်ကူခြေထောက်တွေလို ရွေ့လျားနေပါတယ် ။ ဒါဟာ ဘယ်လက်ရဲ့ ပုံစံမှန်ပါပဲ ။ 3 notes per string , string skipping , interval အကျဲတွေကို ချောမွေ့စွာ တီးခတ်နိုင်ဖို့ လက်တွေကို ချဲကားနိုင်မှ ဖြစ်မယ် ။ လက်ချဲကားခြင်းက ဂစ်တာသမားအတွက် မရှိမဖြစ်လိုအပ်တဲ့ skill တစ်ခုပါ ။ 

လေ့ကျင့်ခန်း - ၁

ဒီ pattern လေးကို ကျက်ထားရမယ် ။ လေ့ကျင့်ခန်းအားလုံး ဒီ pattern ကို ဆင့်ပွားသွားမှာပါ ။ ရိုးပေမယ့် တကယ်ထိရောက်ပါတယ် ။ လေ့ကျင့်ပုံက - - A - B - C - D ဆိုတဲ့ အတွဲ၎တွဲကို ရှိတယ် ။ တတွဲမှာ (နုတ်၂လုံး) ပါတယ် ။ အဲဒါတွေကို တတွဲချင်း လက်မလွှတ်ဘဲ တီးရပါတယ် ။- ဥပမာ - အတွဲ A ကိုတီးတဲ့အခါ D note ကို လက်ညိုးနဲ့တီးပြီး ၊ A# note ကို လက်သန်းနဲ့တီးတဲ့အခါ ၊ D note တီးခဲ့တဲ့ လက်ညိုးကို မလွှတ်ဘဲ ဆက်ဖိထားရပါမယ် ။ ကျန်တဲ့အတွဲတွေလည်း ဒီအတိုင်းပါပဲ ။- ဒီလေ့ကျင့်ခန်းတွေမှာ metronome မလိုပါဘူး ။ လက်၂ချောင်းတွဲစီ ချဲကားလေ့ကျင့်တာဖြစ်လို့ နှေးလေကောင်းလေ ပါပဲ ။

လေ့ကျင့်ခန်း - ၂

လေ့ကျင့်ခန်း ၁ က pattern ကို ထပ်ပွားလိုက်ပါတာပါ ။ ကြိုးတွေကျဲလာတော့ လက်တွေပိုကျဲလာပါတယ် ။ ၅ကြိုးအထိပဲ ရေးပေးထားပါတယ် ။ Acoustic နဲ့ Electric ဂစ်တာမှာတော့ ၆ကြိုးအထိ လေ့ကျင့်နိုင်ပေမယ့် ၊ Classical ဂစ်တာမှာတော့ (လက်သန်း-လက်သူကြွယ်) အတွဲ D က ၁ကြိုးနဲ့ ၆ကြိုး ချဲနိုင်ဖို့ တော်တော်ခက်တယ် ။ လက်ချောင်းရှည်ရင်တော့ အဆင်ပြေမှာပါ ။ရေးထားတဲ့ အခေါက်ရေအတိုင်း အတိအကျတီးစရာ မလိုပါဘူး ။ ၂ကြိုးတွဲချင်းကို ၃မိနစ်စီလောက် တီးရင် အဆင်ပြေပါတယ် ။

ဂစ်တာသမားများအတွက် Up stroke လေ့ကျင့်ခန်း

ဂစ်တာစကေးတွေကို တီးခတ်တဲ့အခါ ... (Ascending) အပေါ်ကြိုးကနေ အောက်ကြိုး / အသံနိမ့်ကနေ အသံမြင့်သို့ တီးခတ်ခြင်းက ပိုမိုလွယ်ကူပြီး ၊ (Descending) အောက်ကြိုးကနေ အပေါ်ကြိုး / အသံမြင့်ကနေ အသံနိမ့်ဆီ ပြန်သွားတဲ့အခါ ထစ်ငေါ့မှုတွေ ရှိတတ်တယ် ။ အဓိက ပြဿနာက ညာလက် Up stroke ကြောင့်ပါ ။ အဲဒီအတွက် up stroke ကို သီးသန့်လေ့ကျင့်ပေးရတယ် ။

မှန်ကန်တဲ့ လက်ကောက်ဝတ်ထိန်းကျောင်းပုံ
ဒီလေ့ကျင့်ခန်းတွေရဲ့ အဓိကသော့ချက်က လက်ကောက်ဝတ် အထားအသို ၊ လှုပ်ရှားပုံပါ ။ အနီးစပ်ဆုံးက စာရေးခြင်း ဥပမာပါပဲ ။ စားပွဲပေါ်က စာရွက်တစ်ရွက်မှာ ဘောပင်ကိုင်ပြီး စာရေးတဲ့အခါ လက်ကောက်ဝတ်ကို သတိထားကြည့်ပါ ။ ဘောပင်ကို လိုရာထိန်းကျောင်းနိုင်ဖို့ လက်ကောက်ဝတ်က စားပွဲမှာ ဒေါက်တိုင်အဖြစ် ထောက်ထားတာ တွေ့ရလိမ့်မယ် ။ တစ်ခါ .. လက်ကောက်ဝတ်ကို ဒေါက်တိုင်အဖြစ် မထောက်ဘဲ လေထဲမှာထားပြီး စာရေးကြည့်ပါ ။ ဘောပင်ကို ထိန်းကျောင်းရ ခက်ခဲတာကို တွေ့ရလိမ့်မယ် ။ အဲဒီ ဥပမာလိုပဲ ။ ဘောပင်ထိပ်ဖျားက စာတစ်လုံးရေးတာနဲ့ ၊ ဂစ်တာလက်ခတ်ထိပ်ဖျားက နုတ်တစ်လုံးကို တီးတာ ... လက်ကောက်ဝတ်ထိန်းကျောင်းမှု  သဘောတရားချင်း အတူတူပါပဲ ။ up stroke မှာလည်း လက်ကောက်ဝတ်လှုပ်ရှားမှုက အရေးကြီးပါတယ်

လေ့ကျင့်ခန်း-၁

ကလက်စစ်ကယ်ဂစ်တာ ညာလက် လေ့ကျင့်ခန်း

အမှန်တကယ်တော့ ဂစ်တာကြိုးကို တီးတယ်ဆိုတာ လက်ချောင်းတွေကိုလွှဲပြီး အရှိန်နဲ့တီးတာ မဟုတ်ပါဘူး လက်ချောင်းရဲ့ထိပ်နဲ့ ဂစ်တာကြိုးကို ထိပြီးမှ ကြိုးကိုအတွင်း ဖက်ကိုဖိပြီး လွှတ်ပေးလိုက်တာပါ ။ အဲ့ဒီတော့ tone production တွေ ထိချက်တွေအတွက် လေ့ကျင့်ခန်းတွေ ရှိပါတယ်။ အဲ့ဒီလေ့ကျင့်ခန်းတွေက အရမ်းကို ရိုးရှင်းပါတယ်။ အရင်ဆုံး လက်လေးချောင်းစလုံးကို ဂစ်တာကြိုးလေးချောင်းပေါ်မှာ အရင်နေရာယူရပါတယ် ။ ပြီးမှ p i m a လက်ချောင်းလေးချောင်းကို တစ်ချောင်းချင်းစီကို ဖိပြီးမှ လွှတ်ချပေးတာပါ ။ p i m a ဆိုပြီးလက်ချောင်းလေးချောင်းဖြစ်လို့ 4/4 timing နဲ့လေ့ကျင့်ပါ ။1st beat မှာ p , 2nd beat မှာ i , 3rd beat မှာ m , 4th beat မှာ. a ဆိုပြီးအစဉ်လိုက်တီးရမှာ ဖြစ်ပါတယ်။ပြီးရင် 4th beat ရဲ့ off beat မှာ p i m a. လက်ချောင်းလေးချောင်းလုံးကို ကြိုးလေးချောင်းပေါ်မှာ နေရာပြန်ယူရပါတယ်။

ညာလက် အခေါ်အဝေါ်
p = (pulger) thumb = လက်မ
i = (indiceo) index finger = လက်ညှိုး
m = (media) middle finger = လက်ခလယ်
a = (anular) ring finger = လက်သူကြွယ်

တူရိယာတစ်ခုကို လေ့ကျင့်တဲ့အခါ

တူရိယာတစ်ခုကို လေ့ကျင့်တဲ့အခါ "လေ့ကျင့်တယ်" ဆိုတာထက်  "ပျိုးထောင်တယ်" ဆိုတဲ့စကားကို ပိုသဘောကျတယ် ။ ဟုတ်ပါတယ် ။ ဂစ်တာလေ့ကျင့်တယ်ဆိုတာ ဂစ်တာနဲ့ ပတ်သတ်တဲ့ အလေ့အကျင့်ကောင်းတွေကို ပျိုးထောင်တာပါ ။ ဒီလိုနားလည်ထားမှလည်း လေ့ကျင့်တဲ့အချိန်တွေကို မငြီးမငွေ့ ဖြတ်သန်းနိုင်မှာပါ ။ ( ကျွန်တော်က ဂစ်တာသမားဖြစ်တဲ့အတွက် ဒီတူရိယာလေ့ကျင့်နည်းကို ဂစ်တာကို ဥပမာထားပြီး ရေးသွားပါမယ်)

  

၁ ။ မလေ့ကျင့်မီ အကြောလျော့ပေးပါ

ဂစ်တာစကျင့်တော့မယ်ဆိုရင် လက်တစ်ချောင်းလုံး (ဖြစ်နိုင်ရင်တစ်ကိုယ်လုံး) အကြောလျော့ပေးပါ ။ တချို့က မလိုအပ်ဘူးလို့ ထင်ကောင်းထင်မယ် ။ အကြောလျော့ခြင်းနဲ့ စိတ်ရဲ့relaxဟာ ခင်ဗျားကို မောင်းတင်ပေးမယ့် ခွန်အားတွေပါ ။ 

  

၂ ။ warm up အမြဲလုပ်ပါ ။ 

Fingering, chromatic scale, fingering stretching  တွေထဲက ခင်ဗျားအတွက် ပေါ့ပါးလွယ်ကူမယ့် တမျိုးမျိုးကို နာရီဝက်လောက် အရင်တီးလိုက်ပါ ။ လက်ချောင်းတွေ သွေးပူလာဖို့ ၊ လွတ်လပ်စွာလှုပ်ရှားဖို့ ၊ finger stamina ကောင်းဖို့ ၊ ဒဏ်မဖြစ်ဖို့ ... warm up မလွဲမသွေတီးရပါမယ် ။ 

  

၃ ။ Metronomeနဲ့ အမြဲကျင့်ပါ ။ 

Metronomeနဲ့ မကျင့်ခဲ့ရင်Bandနဲ့တီးတဲ့အခါ၊ Studioမှာအသံသွင်းတဲ့အခါ အဆင်မပြေမှုတွေ ဖြစ်လာပါမယ် ။ ကိုယ့်ရဲ့ tempoကို ကိုယ်သတိထားမိဖို့ ခက်ပါတယ် ။ စိတ်ကြွလာရင် tempoတက်လိုက် ၊ စိတ်မပါရင် tempo ကျလိုက် ဖြစ်တတ်ပါတယ် ။ 

  

၎ ။*very important* အနှေးဆုံးကိုတီးပါ ။

လေ့ကျင့်နေတဲ့အချိန်မှာ speedကိုခေါင်းထဲ ဝင်မလာပါစေနဲ့ ။ မလောပါနဲ့ ။ speedဟာ ဂစ်တာသမားတိုင်း တပ်မက်တဲ့ ရှိရမယ့် အရည်အချင်းဆိုပေမယ့် ... သူ့ကို အရူးအမူးနဲ့ လိုချင်ပြီးလေ့ကျင့်ပြီ ဆိုတာနဲ့  လမ်းတဝက်မှာ ပြတ်ကျန်ခဲ့ဖို့ သေချာသလောက်ရှိပြီ ။ တခါတလေ ... အနှေးဆုံးတွေကို တီးနေရင်း ခင်ဗျား ငြီးငွေ့လာမယ် ။ သေချာတယ် ။ ဒါကြောင့် ပြောခဲ့ပါတယ် ။ တူရိယာတစ်ခုကို လေ့ကျင့်တယ် ဆိုတာထက် ပျိုးထောင်နေတယ်လို့ ခံယူထားပါ ။ ဒါတွေဟာ ခင်ဗျား မလွဲမသွေ ဖြတ်ကျော်ရမယ့် လှေကားထစ်တွေပါ ။